Menya akayabo kakoreshejwe ku Camera ku mukino wahuza APR FC na Rayon Sports ku Mahoro
Mu mukino ikipe ya APR FC yanganyijemo na Rayon Sports ku munsi wejo muri Stade Amahoro, hakoreshejwe 'Spider Camera' ikaba ari ubwa mbere yari ikoreshejwe mu Rwanda.
Iyi camera ifata amashusho iri kugendera ku migozi iyifasha gutembera impande zose z'ikibuga igurwa hagati y'ibihumbi 600 na miliyoni 1.2 y'Amadorali y'Amerika.
Ishobora kugendera ku muvuduko wa metero icyenda mu isegonda ku ntera ya metero 250 kuri 250.
Ifite uburebure bwa santimetero 87, ubugari bwa santimetero 88 n’ubuhagarike bwa santimetero 87.
Yifitemo ubushobozi bwo gukumira ivumbi cyangwa ubushyuhe bwinshi bwayigeraho kuko yahawe umubiri w’inyuma ukozwe muri aluminum. Ikigero fatizo cy’ubushyuhe kigomba kuba dogere Celsius ziri hagati ya -10 na 40.
Batiri zayo zibika umuriro ikoresha itembera mu kirere. Imwe ifite ubushobozi bwo kuba yawubika mu gihe cy’amasaha ane, iri gukora itahagaze.
Ubwoko bwa camera ziterekwamo harimo izo gufata amashusho mu birori cyangwa imikino birimo kuba ako kanya arizo Sony (P1, P43 na P50), Grass Valley (LDX 80 na LDX 86), Panasonic AK-UB300 na Hitachi DH-H200.
Izifashishwa mu gufata amashusho bisanzwe harimo RED Epic (Dragon, Helium na Monstro), ARRI Alexa Mini, Sony (F55 na Venice) ndetse na Panasonic Varicam.
Ubwoko bwa ‘Lens’ buzajyana n’izi camera ni Fujinon HA13x4.5, Canon HJ14ex4.3, Angénieux Optimo Rouge na 14-40mm.
'Spider Camera' isanzwe ikoreshwa muri shampiyona zikomeye zo ku mugabane w'Iburayi zirimo English Premier League na Bundesliga.
Muri shampiyona y'u Bwongereza yakoreshejwe bwa mbere muri 2018 ku mukino Manchester United yanganyijemo na Liverpool 0-0.
#inyarwanda
